Dagul kung Kapampangan

Aku pu i MC. Canlas ku kang tatang ku. Deng pun mi king baryo San Jose, balen San Fernando, at malapit king Masiku (Mexico). I Ima ko naman Calalang at Galang ya, kareng king baryo Pau, balen ni Santo Tomas, king Pampanga.

Mipanganak ko king Tenejero del Pilar, a baryo ning San Fernando, lipat tete king palengke (tete duyan ampung Baluyot Bridge), dadalanan neng highway (MacArthur ), at malapit king kabisanto ampung deng dating terminal ning La Mallorca Pambusco. Siping ne ning Ilog San Fernando ing Tenejero. Kalipat ning dalan highway ing ilog takeke ya king marangle. Nung mamaltang ka king marangle, miras ka Pau, ing baryong penibatan nang Apu mi.

Malati yang purok ing Tenejero ning Del Pilar. Dati ya kanung marangle iti, anang Ima. Deng minunang ortilano deng apu ku (Apu Simong). Kasamak lamu o makitanam lamu kanu kareng mikibandi gabun. Deng sasabyan dang mikibandi kanita deng Singian, Aguas ampong Rodriguez.

Uling i apu ku ing ortilano, atin yang gabun malapit marangle para keng bale na ampung deng anak na. Deng misisiping bale deng dara mi (Dang Agreng, Dang , ampu i Ima ku, Auring) ampung bapa ku (Apung Elyong). Deng adwang dara ku, kapatad ng ima ku atilu la king Pau (Dang ) ampung Balangkas (Dang Tina).

Ikaming walong mikakapatad, mibait kengan king Tenejero. Aku ing pangadwang bunso. I ima ku i Mang Auring. I tata ku naman i Mang Mento. Ako ing junior (Mamerto) ning pamilya mi. Deng kapatad ku mula pangani ila di Atsing Nati (Natividad), Atsing Bella, Kong Dan (Luzvimindo), Atsing Glo, Kong Ato (Renato), Kong Nelson, aku, ing bunso mi i Joji (George).

Anyang mibait ku, banwang 1956, darakal na la naman deng tutuknan king del Pilar, siguru uling San Fernando magprogreso ya. Dakal ka reng kasiping ming bale menibat la naman keng baryo ampung marangle. Pero kanita, maliban kareng Yutuc ampung Tiglao ampu i apu ku at bapa, ilamu deng ortelano, karaklan mag-obra la deng taga-Tenejero king palengke at king La Mallorca.

Disnan ko anyang malati ko, atin kepang tindahan. Magtinda ya i ima ku. I tatang ku naman, magobra ya king kapitolyo, clerk ya keng gobyerno, kayapin alwa ke dili pangabyayan. Asabi mu na atin-atin kami nung iwangis kami kareng siping ming bale. Kilala ya ing Tenejero kareng pulkero, magtindang malan, maglakong gule, pamangan ampung sweepstake, mag-shine sapatos, mag-obrang mekaniko keng La Mallorca, pulis ampung sanggano.

Anyang daragul adwa ing laww ku keng Tenejero. Malapit ya marangle, kayapeng dinagul kung sane keng bie gabun at tatanam. Deng kamag-anak mi dakal ortelano la naman. Uling malapit yamu king kabalenan, dinagul kun naman kareng taung palengke at kabalenan. Keng Ingles rural, ampung looban o urban squatter area ya kanita ing Tenejero.